BABA RUDI UNIVIKE

Unaweza kuondokewa na mtu muhimu na mambo yako kuyumba ukatamani bora arudi. Mtunzi anamlilia mmoja katika watu wake muhimu

Nimesema visikike, angalau kwa umbali

Kwa wanaume na wake, ali ala kulli hali

Tangu baba uondoke, sinae wa kujadili

Baba rudi univike, medondosha sarawili

Umekwenda wapi baba? Mbona hujaniarifu

Mwana usawa wakaba, nalala kwenye sakafu

Nani atakae ziba, pengo lako takatifu

Baba rudi univike, medondosha sarawili

Tulipanga mengi hasa, tutekeleze mi nawe

Si maswala ya siasa, ni mambo yetu mi nawe

Leo nimeshakukosa, uliko unielewe

Baba rudi univike, medondosha sarawili

Umekwenda wapi faza, miji yote sikuoni

Si Dodoma wala mwanza, kote haupatikani

Mwanao ninakuwaza, nijekutia machoni

Baba rudi univike, medondosha sarawili.

Fikira zinapishana, IBUN ni kwa babae

Mebaki moyo wanena, sina wakusema nae

Majanga yamepandana, sasa nani nimwambie?

Rudi lau mara moja, nikunong’oneze kitu.

Ulimwengu ni mzito, bora mlima sayuni

Ulimwengu ni wamoto, bora maji ya kunguni

Ulimwengu ni mkato, wera wembe wa dukani

Rudi lau mara moja, nikunong’oneze kitu.

Yapo mengi majaribu, yalonizidi umuri

Kila siku naharibu, sijafanyha jambo zuri

asa naona aibu, kama lopata sifuri

Rudi lau mara moja, nikunong’oneze kitu.

Baba wapi umekwenda? Nikupe namba za simu

Unitafute huenda, nipunguze yangu hamu

Kama upo GENDA GENDA, nimuagize ADAMU

Rudi lau mara moja, nikunong’oneze kitu.

Nalia bila machozi, ni siri ya moyo wangu

Naficha hisia hizi, wasijue walimwengu

Hata kwenye usingizi, nakuota ndugu yangu

Rudi tupange mipango, tuendeshe jambo letu.

(tar 17.04.2017 – jumatatu saa 9:20 usiku wa manane)

NA; SAIDI BUNDUKI