penda ulichopata.

Ulipo si tarajio, hwenda baada ya kukosa

Uliitamani leo, kuwa na ile furusa

Ridhika na matokeo, ulionayo kwa sasa

Penda ulichokipata, kaza buti songa mbele

Ulitamani uganga, ama bingwa daktari

Uwe fundi wa manyanga, au kutibu sukari

Leo una unga unga, ni fundi wa vibatari

Penda ulichokipata, kaza buti songa mbele

Ndoto zako udereva, upige boda tu boda

Ulisoma ukaiva, lakini kazi ni shida

Leo upo USA RIVER, fundi wachonga vigoda

Penda ulichokipata, kaza buti songa mbele

Ulipenda uongozi, ubunge ama waziri

Kuviongoza vizazi, changamoto ulikiri

Leo wakata viazi, chipsi kwa kachumbari

Penda ulichokipata, kaza buti songa mbele

Ulilitamani jeshi, mambo mengi ulikosa

Na ulinzi shirikishi, kote kote ulikosa

Ulipenda uandishi, leo waandika posa

Penda ulichokipata, kaza buti songa mbele

Uonapo washkaji, hutamani fani zao

Hwenda ndo chako kipaji, kweli ulisoma nao

Ulipenda utangazaji, japo redio za mbao

Penda ulichokipata, kaza buti songa mbele

Hwenda hata mwenzi wako, ulonae maishani

Hakuwa chaguo lako, waungulika moyoni

Ni siri ya moyo wako, wamchekea usoni

Penda ulichokipata, kaza buti songa mbele

Ndivyo yalivo maisha, haupati kila kitu

Wengi walisha chemsha, visu vyao kuwa butu

Piga kazi changamsha,- bongo utapa tu

Penda ulichokipata, kaza buti songa mbele

By saidi R Bunduki.