HIZI

Mtunzi anatufumba, amezungumzia HIZI hatujui amemaanisha nini. Lakini kila mtu ana tafsiri yake

 Zinani hizi nanii, mbona zinapendwa mno 

Zinatutoa nishai, kibogoyo / wenye meno 

Nakubali sikatai, nitakupa na mifano 

Hizi zimetiwa nini?, mbona hizi zina visa? 

Wameuwana wa kale, sababu ya hizi hizi 

Uchawi kwa misukule, vizazi hadi vizazi 

Wamechukuana nywele, kufungiana hirizi 

Hizi zimetiwa nini?, mbona hizi zina visa? 

Kila siku makelele, mitaani hayaishi 

Wana hawaendi shule, hizi zinawashawishi 

Sio huyu wala yule, maneno hayawaishi 

Hizi zimetiwa nini?, mbona hizi zina visa? 

Mwanzo wa ngoma ni lele, lele mama lele mama 

Bora yacheze machale, mapema uanze goma 

Ukisema ngoja nile, nawe zitakusakama 

Hizi zimetiwa nini?, mbona hizi zina visa? 

Hugombana hata ndugu, hizi hazimwachi mtu 

Zinachochea vurugu, hazimwachi mtu katu 

Hata majambazi sugu, uwe mtu au fyatu 

Hizi zimetiwa nini?, mbona hizi zina visa? 

Pale ukishazijua, kuziacha hutotaka 

Mateka waweza kua, kila siku kuzisaka 

Hazichoshi abadia, hadi tutapo kuzika 

Hizi zimetiwa nini?, mbona hizi zina visa? 

Zi tamu shinda asali, usisikie porojo 

Hakuna yake mithili, zimeuzidi urojo 

Hata ukiwa mkali, kwake watuliza fujo 

Hizi zimetiwa nini?, mbona hizi zina visa? 

Hizi zimetiwa nini?, mbona hizi zina visa? 

Madini aina gani?, mbona zinatutikisa? 

Sijui mdalasini?, sijui ukweli hasa 

Hizi zimetiwa nini?, mbona hizi zina visa? 

Au zimetiwa nazi?, kuungwa na tui bubu 

Sijui ni tangawizi?, tamu ye shinda zabibu 

Bado zinanipa kazi, nawaza sipati jibu 

Hizi zimetiwa nini?, mbona hizi zina visa? 

Nisaidie mwandani, saidi nipate jua 

Siri yake kitu gani?, mbona inanisumbua 

Bado ningali swalini, jibu nalisubiria 

Hizi zimetiwa nini?, mbona hizi zina visa? 

Swali.

Je? HIZI ninini?
Weka comment yako hapo chini.

By Saidi R. Bunduki.